Ujian Iman

UJIAN IMAN

Urang sadaya tos pada mafhum yen kondisi iman urang teh tara stabil tapi sok labil, dina harti sakapeung ngandelan sakapeung ngipisan. numutkeun Rosulullah Yazidu wayankusu, sakapeung nambahan sakapeung ngurangan. Kusabab kitu perlu urang neangan jurus-jurus jetu kanggo miara sareng ngajaga kondisi iman urang supaya tetep istiqomah. sakurang-kurangna nyaho kalemahan iman urang teh palebah mana jeung dina sektor naon, supaya gampang ngubaranana. 

margi lamun urang tos nyebatkeun iman, pasti baris diuji ku Allah nepi kamana kualitas iman urang. Datangna bisa ti indung, ti bapa, ti anak ti pamajikan atawa ti sobat. naha ku kasenengan atawa ku katunggaraan, naha ku kadigdayaan hirup nyaeta harta, tahta atawa manita. Sabab tilu kadigdayaan eta anu jadi udagan sarerea.

أَحَسِبَ النَّاسُ أَنْ يُتْرَكُوا أَنْ يَقُولُوا آمَنَّا وَهُمْ لَا يُفْتَنُونَ

"naha jelema teh nyangka yen maranehna bakal diantep sanggeus nyebutkeun "abdi tos iman" bari jeung moal diuji?" (al-ankabut: 2)

ujian jeung kahirupan mangrupakeun paket anu teu bisa dipisahkeun. Lamun urang hayang hirup kudu siap diuji, tapi lamun teu siap diuji ulah hayang hirup. Tantangan hirup anu pangbeuratna nyaeta nyanghareupan godaan, boh godaan internal anu geus aya dina diri urang nyaeta hawa nafsu, atawa eksternal anu datang ti luar nyaeta syetan, boh syetan ti golongan manusa anu puguh jentulna, atawa ti golongan jin anu tara bungkeuleukna. 

Jurus anu sederhana pikeun nyanghareupan godaan syetan : Kahiji, kudu apik neangan batur gaul. kadua,kudu yakin yen urangteh bakal hirup diakherat. katilu, kabungah jeung kasusah kudu jadi ladang amal. kaopat, tanjebkeun niat anu kuat, tekad anu mantep.

Saenyana godaan syetan pangbeuratnamah nyanghareupan ajakan hawa nafsu anu ngancik dina diri urang masing-masing,anu disaurkeun ku Rosulullah jihad akbar. numatak sababarahakali al-Qur'an ngawanti-wanti : 

وَلَا تَتَّبِعِ الْهَوَىٰ فَيُضِلَّكَ عَنْ سَبِيلِ اللَّهِ ۚ إِنَّ الَّذِينَ يَضِلُّونَ عَنْ سَبِيلِ اللَّهِ لَهُمْ عَذَابٌ شَدِيدٌ بِمَا نَسُوا يَوْمَ الْحِسَابِ

"jeung omat ulah ngagugu kana ajakan hawa nafsu, sabab hawa nafsuteh bakal nyasabkeun maneh tina jalan Allah. Satemena jalma-jalma anu kasasar tina jalan Allah baris meunang siksa anu kacida beuratna, sabab maranehna poho kana poe balitungan". (As-saad: 26).

Nabi Adam oge anu parantos dijejelan ku elmu masih tisoledat, atuh komo deui pantaran urang. Tapi bedana teh ari Nabi Adam mah tisoledatna ngan sakali, tuluy anjeuna tobat. Ari urangmah balas tisoledat, tapi teu tobat-tobat. 

Kulantara kitu urang kudu leuwih waspada, perlu mibanda keterampilan memenej pribadi. kanggo ngokolakeun potensi karunia illahi yaeta hawa nafsu, qolbu, sareng akal. malah kudunamah sagala kagiatan pangwangunan digerakkeun dikadalian ku kaimanan.

Iman baris ngalahirkeunK kahiji, kajujuran, contona nalika Sayidina Umar bin Khatab nyamar ngolo budak angon supaya ngajual domba anu diangon kumanehna. tapi eta budak nolak, pokna: "kuring isin ku Allah, sabab domba ieu teh lain milik kuring, Sanajan dunungan kuring moal apaleun lamunmah kukuring dombana dijual. Kadua, Optimisme, anu dicontokeun ku Siti Hajar. sok sanajan awalna dianggap mustahil, piraku aya cai ditengah padang pasir, tapi berkat parjoangan Siti Hajar yang tidak mengenal lelah, akhirna Allah Nu Maha Rahman ngadatangkeun sumur zam-zam. Katilu Kaikhlasan, anu dicontohkeun ku hiji karyawan perkebunan anu marabkeun tilu potong roti ka anjing anu kalaparan, padahal manehna sorangan ge keur lapar. Akhirna eta budak jadi merdeka, kebon korma dihibahkeun jadi milikna, kitu ganjaran tina kaikhlasan. Mudah-Mudahan iman urang beuki kuat, elmu beuki ningkat, amal beuki hebat, sarta dibarengan ku ngadu'a teu pegat-pegat. 

Wallahu'alam bisshowab...     

LAPORAN KEUANGAN DKM & PAN. PEMBANGUNAN MASJID Feb 2014

http://www.mediafire.com/view/jgsg3395t3e7qsl/lap_keuangan_dkm_PER_28_FEB_2014.xlsx
http://www.mediafire.com/view/akc0aehbe46wa64/lap._keuangan_panitia_pemba.masjid_per_28_feb_2014.xlsx 

Konci Kabagjaan Hirup

Konci Kabagjaan Hirup

Aya dua hal utami anu didawuhkeun ku Nabi Muhammad SAW., mangrupa konsep hirup, ajaran Islam anu sederhana, hampang, gampang, enteng. kalimatna singket eusina padet, kecap-kecapna sederhana, tapi maknana pohara agungna, basana simpel mudel pepel, pondok betekok nyokok. "Afsus salam washilul arham". sebarkeun salam jalin silaturhmi, lamun konsep hirup ieu dilaksanakeun, kamakmuran, kaamanan, sareng kabagjaan baris tinekanan, situasi bakal senang ngahenang ngahening, tiis ceuli herang mata, dimana wae urang aya moal aya kahariwang jeung kamelang.

Sabenerna kanggo masyarakat urangmah ucapan salam teh tos ngabudaya, tegesna ibadat nu geus jadi adat. tapi hanjakal antara ucapan jeung kanyataan masih keneh patukang tonggong, jauh panggang dari api. Padahal dina eta ucapan teh ngamuat tilu du'a anu kacida pentingna sarta dipikabutuhna ku urang sadaya, yaeta: kahiji salamet, kadua rahmat, katilu barokah.
teu aya hiji jalma anu kumelendang dijagat raya anu teu butuh ku salamet. Rengse sholat urang ngadu'a menta salamet, Allohumma anta salam waminka salam wailaika ya'udu salam sareng saterasna. nyakitu deui lamun urang pasarandog atawa rek papisah jeung hiji jalma, pasti sok meungkeut heula jangji pasini anu kedal kana letah marengan rasa ku ngucapkeun salam. Anu hartina silih amankeun, bari kenging ridho Allah SWT.
Anu kadua, rahmat, yaeta karunia illahy anu hadlir tanpa upaya manusa. misalna hiji jalma keur stres sabab rek nyaba katinggaleun kareta api. tapi barang manehna meunang beja yen kareta anu rek ditumpakan teh tiguling, kakara manehna sadar bari ngucapkeun subhanallah, astaghfirullah, inget kana Firman Allah SWT.

وَعَسَى أَن تَكْرَهُواْ شَيْئاً وَهُوَ خَيْرٌ لَّكُمْ وَعَسَى أَن تُحِبُّواْ شَيْئاً وَهُوَ شَرٌّ لَّكُمْ وَاللّهُ يَعْلَمُ وَأَنتُمْ لاَ تَعْلَمُونَ

anu hartina : "bisa jadi anu dipikangewa ku maneh teh leuwih alus pikeun maneh. jeng bisa jadi anu dipikaresep ku maneh justru goreng pikeun maneh. mungguh Allah mah Maha Uninga sedeng maraneh teu nyaraho" (QS. 2:216)

Anu katilu, Barokah, hartina nilai tambah. di urang sok disebut barekat. Nepi ka aya sisindiran "balakatiktrik balakacomrang, beuteung mutiktrik barekat meunang" tegesna menang kauntungan ganda. lir ibarat tutuwuhan anu dipelak dina tanah lendo. jadina alus, buahna mulus, didahar teu putus-putus, rahayat teu kukulutus. saeutik mahi loba walatra, banyak tidak berlebih sedikit tapi cukupl siuk dengdeng siuk langgeng, sanajan disiuk tuluy-tuluyan caina teu orot-orot. numatak pantes Nabi Nuh oge nalika disalametkeun tida bencana banjir teh ngadu'a : 

وَ قُلْ رَبِّ أَنْزِلْني‏ مُنْزَلاً مُبارَكاً وَ أَنْتَ خَيْرُ الْمُنْزِلينَ

anu hartina: "Jeung pok omongkeun: Nun Gusti, mugi Gusti ngalungsurkeun abdi ditempat anu barokah, margi Gusti teh anu maparin tempat turun anu pangsae-saena" (QS 23:29)

Konsep silaturahmi dina Islam teh nyaeta salamet jeung nyalametkeun, senang jeung nyenangkeun. Dina Al-Qur'an parantos ditegeskeun "innamal mu'minuuna ikhwatun" saestuna jalma-jalma anu ariman teh eta dulur (QS 49:10). didieu katinggal awal ayatna innama, tungtuna ikhwatun sanes ihwanun. hartina pikeun negaskeun sarta negeskeun yen sasama mu'min mah kadia dulur sakandung pet ku hinis. 

Numatak asa racleng tai ceuli lamun nguping umat Islam pagetreng, nepi ka pegat silaturahmi, tina alatan beda partai, etamah dijamin asup ka naraka. sedengkeun kauntungan dina silatuhami tos jelas, umur panjang, rejeki deukeut. tapi pegat silaturahim, istilahna cilaka duabelas. haram asup kasawarga, teu diaku umat nabi, rejeki ngajauhan, cilaka ngadeukeutan.

jadi sakumaha alusna dina hablun minallah tapi lamun goreng dina hablun minannas, eta cilaka. hebat dina ibadah mahdhoh tapi goreng dina ibadah goer mahdhoh. eta oge diancam ku naraka. Tapi lamun satingkah saparipolah geus nincak kana papagon agama jeung darigama eta anu disebat kashalehan sosial. numatak loba musuh saurang loba teuing, sobat sarebu masih kurang. musuh saurang matak cape, sobat sarebu matak salse jeung tibra sare.

Tetela anu jadi konci kabagjaan hirup teh singhoreng silaturahmi. 

wallahu'alam bisshowab,,,